Службен весник на РМ, бр. 183 од 12.12.2014 година МИНИСТЕРСТВО ЗА ИНФОРМАТИЧКО ОПШТЕСТВО И АДМИНИСТРАЦИЈА КОДЕКС ЗА АДМИНИСТРАТИВНИ СЛУЖБЕНИЦИ Предмет (Член 1) Со овој кодекс се пропишуваат етичките стандарди и правилата на однесување на административните службеници. Цел (Член 2) Целта на овој кодекс е поттикнување на доброто постапување и однесување на административните службеници и зајакнување на довербата на граѓаните во работата на институциите на јавниот сектор. Примена (Член 3) Етичките стандарди и правилата на однесување административниот службеник ги применува во односите со колегите, со претпоставените и со странките, на неговото работно место, но и во приватниот живот и јавноста. Законитост и Професионалност (Член 5 и Член 6) Административниот службеник ги почитува законските прописи и ги извршува работите посветено, самостојно, навремено и професионално врз основа на своите работни компетенции и правилата на службата.